(Arlos, 1978). Llicenciaú n’Historia pola Universidá d’Uviéu. Tien publicaos los llibros Las tardes baldías (KRK, 2004; Premiu Asturias Joven de Poesía 2003, en castellano), Prisión de naúfragu (Trabe, 2006), L’amarga cazumbre (Trabe, 2008; Premiu Nené Losada Rico de Poesía 2006), Como crecieres tu (Trabe, 2008; Premiu Teodoro Cuesta de poesía 2007), Desinencies (Ambitu, 2009) y Lo peor del bon tiempu (Trabe, 2010; Premiu Fernán Coronas de Poesía 2009). Algamó los premios Elvira Castañón de Poesía 2009 pola obra Aquella xente nunca sabía aú llevaben les carreteres xunta les que vivíen (inéditu) y Llorienzu Novo Mier de creación lliteraria 2011 pola obra La mano vacía (inéditu).
ESCONDESE ellí yera temblar.
Naide dormía. Del techu pingaba llacre
sobre los fruteros, al ferver la lleche
una rabasera revenida esparaxicaba
les cartes escaecíes xunta l’arlequín
de porzolana. Les nueches de tormenta
más que les ventanes la tronada
facía retumbar los espeyos. Naide
suañaba. La esponxa llatía ente los botes
de champú como un corazón
inconsolable, sobre’l gastáu
barniz de les puertes el rellumu
de les llámpares yera un amanecer obsoletu: facía
fríu al abrir los caxones y nel so fondu la bufanda
yera un aletéu varáu. L’insomniu
dexábanos aguyetes. Al escondese
aquel siempre yera’l primer sitiu nel que nos buscaben.
(Inédito)
